VOV4.Bahnar - Pơgê năr 23/2, tơ̆ Hơnĭh bơ̆ jang Kơdră chĕp pơgơ̆r Tĕh đak, Kơdră chĕp pơgơ̆r Tĕh đak Nguyễn Xuân Phúc sơng pơma dơnŭh hăm Bơngai tang măt ăn Ƀok Kơdră tơm Mi găh Tơplĭh tŏ ‘mi kial John Kerry. Hôn bơnê kơtang ƀok John Kerry găh tơdrong hơdrin pơtrŭt kơtang jang hơdoi ƀar tĕh đak lơ̆m khei năr au ki, lơ̆m au đei tơ jră tang găn hăm tơplĭh tŏ ‘mi kial, Kơdră chĕp pơgơ̆r tĕh đak athei Bơngai tang măt John Kerry pơtrŭt athei Khul kơdră Teh đak Mi hơnơ̆ng tơgŭm djru Việt Nam lơ̆m tơdrong jang gĭt kăl au. Kơdră chĕp pơgơ̆r Tĕh đak jei hôn bơnê tơdrong iŏk đei jơnei đơ̆ng rim ‘măng năm tơmang Việt Nam đơ̆ng Kơdră chĕp pơgơ̆r Mi, mă kăl ‘nŏh ‘măng năm tơmang đơ̆ng Kơ iĕng Kơdră tơm Kamala Harris, pơtrŭt kơtang tơgoăt tơgoăl Jang hơdoi tôm tong ƀar păh tĕh đak. Bơnê Kơdră chĕp pơgơ̆r tĕh đak hlôi ‘măn jơ ‘năr sơng pơma dơnŭh, ƀok John Kerry akhan, lơm hơyak atŏk tơ iung ‘lơ̆ng hơ iă, tơgoăt tơgoăl Jang hơdoi tôm tong Việt Nam-Mi roi năr roi kơtang, tơpă păng jơnei. Pơma dơnŭh găh tơdrong đak dơsĭ roi năr roi tŏk kơtang păng đei ƀơm kơnê̆ trŭh tơring Tơmăn đak kroong Cửu Long păng rim tơring thŭng kơ Việt Nam, ƀok John Kerry tơbăt, Mi gô tơgŭm Việt Nam lơ̆m tơdrong tơplĭh tŏ ‘mi kial, tơplĭh ŭnh hơyŭh jing trong jang ŭnh hơyŭh rơgŏh ‘lơ̆ng, mă kăl ŭnh hơyŭh jơ̆ng ‘năr. ‘Ngoăih kơ ‘nŏh, Mi jei gơ̆h tơgŭm Việt Nam jang kiơ̆ tơplĭh kơsô̆, tơgŭm ăn atŏk tơ iung muk drăm tơpôl.

Tơblơ̆ nơ̆r: Amazưt