VOV4.Bahnar - Kơsơ̆ năr 1/8, tơ̆ Hơnĭh bơ̆ jang Kơdră chĕp pơgơ̆r Tĕh đak, Kơdră chĕp pơgơ̆r Tĕh đak  Nguyễn Xuân Phúc sơng pơma dơnŭh hăm Kơdră jang tơbôl Hy Lạp Nikolaos Dendias ƀlep lơ̆m jơ ‘năr năm tơmang Việt Nam. Kơdră chĕp pơgơ̆r Tĕh đak Nguyễn Xuân Phúc hôn bơnê ‘măng năm tơmang Việt Nam blŭng a đơ̆ng ƀok Diedias hăm kơchư̆k jang Kơdră jang Tơbôl Hy Lạp; adoi, lui ‘măng năm tơmang gô tơgop gĭt kăl lơm pơtrŭt kơtang tơgoăt tơgoăl, joăt joe ‘lơ̆ng rŏ ƀar păh Việt Nam păng Hy Lạp.

Kơdră chĕp pơgơ̆r Tĕh đak Nguyễn Xuân Phúc sơng pơma dơnŭh hăm Kơdră jang tơbôl Hy Lạp

Kơdră chĕp pơgơ̆r Tĕh đak tơbăt jơhngơ̆m đon bơnê kơ Hy Lạp hlôi tơgŭm djru 50.000 Euro mă Hy Lạp ‘măn ăn Dơnŏ anih bơ̆ jang Olympic Tĕh đak Việt Nam păng 250.000 kơliêu vaccine tang găn Covid-19 lơ̆m vă đĭ sơnăm 2021. Kơdră chĕp pơgơ̆r tĕh đak tơbăt, Việt Nam ling lang vei kơ jăp jơhngơ̆m đon tơgoăt tơgoăl ‘lơ̆ng hơ iă atŭm hăm tơdrong tơgŭm djru gĭt kăl đơ̆ng Hy Lạp dành ‘măn ăn kơ Việt Nam lơ̆m iung tơblăh pơjing đei tơdrong pơm tơm kơ dĭh ăn kon pơlei, tĕh đak rơngei keh kong, adoi nhen lơ̆m tơ iung pơjing păng atŏk tơ iung tĕh đak hrei au.

Tơblơ̆ nơ̆r: Amazưt