VOV4.Bahnar - Kơsơ̆ năr 13/4, tơ̆ Hơnĭh bơ̆ jang Kơdră chĕp pơgơ̆r Tĕh đak, Kơdră chĕp pơgơ̆r Tĕh đak Nguyễn Xuân Phúc sơng pơma dơnŭh hăm Kơdră tang măt Tĕh đak Cộng Ai Cập, yă Amal Abdel Kader Elmorsi Salama pơtrŭh ăn Kơthơ Tĕh đak.  Tơ̆ jơ sơng, Kơdră chĕp pơgơ̆r Tĕh đak sơkơ̆t hơdăh, Việt Nam ling lang lăng kơ jăp tơgoăt tơgoăl joăt joe ‘lơ̆ng hơ iă hăm Ai Cập păng lăng Ai Cập jing tĕh đak jang hơdoi kăl hlŏh kơ Việt Nam tơ̆ châu Phi. Việt Nam ling lang hôn bơnê kơtang hơnăp jang păng hơnĭh dơ̆ng kăl kơ Ai Cập tơ̆ châu Phi păng lơ̆m apŭng plĕnh tĕh. Tơbăt, kon pơlei Ai Cập ling lang hôn bơnê kơtang tơdrong oei sa ‘lơ̆ng rŏ adoi nhen chăl sơnăm kơ Việt Nam, Kơdră tang măt Ai Cập ‘mĕh vă ƀar păh đei lơ trong jang pơtrŭt kơtang hlŏh dơ̆ng lơ̆m tơdrong au, mă kăl mư̆h Ai Cập jei đei tơdrong oei sa gĭt kăl dăr sơnăm lei lăi hăm Việt Nam.

Tơblơ̆ nơ̆r: Amazưt