Kơsơ̆ năr 26/10, tơ̆ Hơnĭh bơ̆ jang Kơdră chĕp pơgơ̆r tĕh đak, Kơdră chĕp pơgơ̆r Tĕh đak Nguyễn Xuân Phúc sơng pơma dơnŭh hăm Kơdră tang măt rim tĕh đak El Salvador, Ấn Độ, Hàn Quốc pơtrŭh kơthơ tĕh đak

Kơdră chĕp pơgơ̆r tĕh đak hăm Kơdră tang măt tĕh đak Ấn Độ atŭm hăm rim kơdră tang măt tơ̆ jơ sơng pơma dơnŭh

Tơ̆ jơ sơng Kơdră tang măt Tĕh đak El Salvador, Kơdră chĕp pơgơ̆r Tĕh đak sơkơ̆t hơdăh, Việt Nam lăng kơjăp păng ‘mĕh vă hơnơ̆ng atŏk kơtang tơgoăt tơgoăl hăm rim tĕh đak lơ̆m tơring Mi Latinh pơma atŭm, hăm Cộng hòa El Salvador pơma hơdrô̆. Việt Nam ling lang ƀlŏk hơdơ̆r tơgoăt tơgoăl, tơdrong tơgŭm djru đơ̆ng kon pơlei Mi Latinh, lơ̆m au đei kon pơlei tĕh đak El Salvador, lơ̆m chăl tơblăh vang pơm rơngei keh kong ăn hơdrĕch hơdrung sơ̆ păng tơ iung pơjing tĕh đak hrei au. Hmach chơt hơ iă ăn kơ ƀok Sandeep Arya đei pôk tơmơ̆t pơm Kơdră tang măt tĕh đak Ấn Độ tơ̆ Việt Nam, Kơdră chĕp pơgơ̆r Tĕh đak Nguyễn Xuân Phúc sơkơ̆t hơdăh trong bơ̆ jang đơ̆ng Việt Nam ling lang lăng kơ jăp tơgoăt tơgoăl ‘lơ̆ng liĕm păng jang hơdoi gĭt kăl tôm tong hăm Ấn Độ, mĭnh tĕh đak tŏk bŏk atŏk tơ iung kơtang, đei hơnăp jang păng hơnĭh dơ̆ng kơtang lơ̆m tơring păng lơ̆m apŭng plĕnh tĕh. Hmach chơt hơ iă ăn kơ yă Oh Youngju đei pôk tơmơ̆t ‘nŏh Bơnai drŏ kăn pơm Kơdră tang măt tĕh đak mă blŭng kơ Hàn Quốc tơ̆ Việt Nam, Kơdră chĕp pơgơ̆r Tĕh đak Nguyễn Xuân Phúc lui hăm trong bơ̆ jang tôm tơdrong đơ̆ng yă Kơdră tang măt tĕh đak, tơgoăt tơgoăl ƀar tĕh đak gô roi năr roi atŏk tơ iung hlŏh dơ̆ng, jơnei hlŏh dơ̆ng.