VOV4.Bahnar - Kơsơ̆ năr 13/5, tơ̆ Hơnĭh bơ̆ jang Kơdră chĕp pơgơ̆r Tĕh đak, Kơdră chĕp pơgơ̆r tĕh đak Nguyễn Xuân Phúc sơng pơma dơnŭh hăm Yŏng khŭl lĭnh Indonesia Prabowo Subianto.

Rup jơ tơ ƀơ̆p pơma dơnŭh

Kơdră chĕp pơgơ̆r Tĕh đak hôn bơnê kơktang pơtôch ‘măng pơma đam ƀar păng Yŏng Khŭl lĭnh păng chơt hơ iă ƀô̆h hơdăh tơgoăt tơgoăl dĭh băl hơnơ̆ng atŏk tơ iung. Ƀar tĕh đak đei rim trong jang atŏk kơtang tơ iung pơjing kơ jăp jơhngơ̆m đon lui kiơ̆ chinh trĭ; tơlĕch jang tôm tong, jơnei, tơpă rim hla bơar pơkăp jang hơdoi hlôi kĭ pơkăp, atŏk kơtang jang hơdoi ƀar păh rim khŭl lĭnh, mă kăl hơnơng chă pơma dơnŭh, tơtom jang hơdoi xek tơlang rim tơdrong đei ƀô̆h tơ̆ đak dơsĭ ƀar păh Khŭl linh đak dơsĭ păng Kanh sat đak dơsĭ kơ ƀar tĕh đak. Kơdră chĕp pơgơ̆r tĕh đak sơkơ̆t hơdăh, Việt Nam lăng kơ jăp tơgoăt tơgoăl hăm Indonesia, tĕh đak jang hơdoi gĭt kăl tơ̆ tơring păng hơnơ̆ng pơtrŭt kơtang tơgoăt tơgoăl hăm Indonesia atŏk tơ iung ‘lơ̆ng, sơđơ̆ng, kơ jăp păng đunh đai, keh kong lơ̆m rim tơdrong: Mŭk drăm, sơđơ̆ng, vei lăng tĕh đak, jŏh ayŏ, pơtho pơhrăm, tơmang pơ hiơ̆ păng kon pơlei năm ngôi dih băl.

Tơblơ̆ nơ̆r: Amazưt