VOV4.Bahnar - Kơsơ̆năr 8/6, tơ̆ Hơnĭh bơ̆ jang Kơdră chĕp pơgơ̆r Tĕh đak, Kơdră chĕp pơgơ̆r Tĕh đak Nguyễn Xuân Phúc sơng pơma dơnŭh hăm Yŏng Khŭl lĭnh Ân Độ Rajnath Singh tŏk bŏk năm tơmang Việt Nam.

Tơ̆ jơ sơng, Kơdră chĕp pơgơ̆r Tĕh đak Nguyễn Xuân Phúc chơt hơ iă ƀô̆h tơdrong tơgoăt tơgoăl jang hơdoi khŭl lĭnh ƀar tĕh đak hơnơ̆ng atŏk tơ iung ‘lơ̆ng, jang hơdoi hơ iă, jơnei, tơgop git kăl lơ̆m tơgoăt tơgoăl ƀar tĕh đak. Lăp đon hăm nơ̆r pơma đơ̆ng Yŏng lĭnh Ấn Độ Rajnath Singh pơma tơlĕch, Kơdră chĕp pơgơ̆r Tĕh đak Nguyễn Xuân Phúc pơma hơdăh, jang hơdoi vei lăng sơđơ̆ng tĕh đak ‘nŏh jing mĭnh tơdrong jang hơdoi dĭh băl gĭt kăl hlŏh kơ Việt Nam - Ấn Độ. Lơ̆m khei ‘năr lơ̆m apŭng plĕnh tĕh, lơ̆m tơring đei tơdrong au to hrei au, Kơdră chĕp pơgơ̆r tĕh đak hôn bơnê Dơnŏ anĭh tơm Khŭl lĭnh ƀar tĕh đak hơnơ̆ng atŏk kơtang tơ iung pơjing jơhngơ̆m đon lui kiơ̆ chĭnh trĭ kơ jăp, tơlĕch jang tôm tơdrong, ‘lơ̆ng hơ iă rim hla bơar jang hơdoi hlôi đei kĭ pơkăp, hôn bơnê kơ ƀar Dơnŏ anĭh tơm Khul lĭnh ƀar tĕh đak kĭ pơkăp Nơ̆r tơchơ̆t atŭm găh tơgoăt tơgoăl jang hơdoi vei lăng sơđơ̆ng tĕh đak Việt Nam - Ấn Độ truh sơnăm 2030.

Tơblơ̆ nơ̆r: Amazưt