VOV4.Bahnar - Năr brei (11/5), tơ̆ pơlei tơm Hồ Chí Minh, Kơdră chĕp pơgơ̆r Tĕh đak Nguyễn Xuân Phúc atŭm hăm Khŭl Kơdră tang măt Kuô̆k hô̆i pơlei tơm Hồ Chí Minh hlôi tơ ƀơ̆p pơma dơnŭh hăm bơngai tăh hla pơlei tơm tơ̆ rim apŭng Củ Chi, Hóc Môn, Pơlei tơm Thủ Đức ‘moi kiơ̆ kơtă păng trư̆k tuyên.

Iung pơma tơ̆ hop akŏm, Kơdră chĕp pơgơ̆r Tĕh đak Nguyễn Xuân Phúc hôn bơnê kơtang kơ bơngai tah hla pơlei tơm Hồ Chí Minh pơma tơlĕch lơ tơdrong hăm tơdrong atŏk tơ iung kơ pơlei tơm păng lơ̆m tĕh đak. Tơ̆ hop akŏm, Kơdră chĕp pơgơ̆r Tĕh đak Nguyễn Xuân Phúc athei kơdră chĕp pơgơ̆r rim tơring păng pơlei tơm Hồ Chí Minh tơl hơdăh hloi dôm tơdrong mă bơngai tăh hla apĭnh, adoi đei pơgơ̆r dơ̆ng đơ̆ng rŏng vă tơl hơdăh dôm nơ̆r apĭnh đơ̆ng bơngai tăh hla găh dôm tơdrong jang tim mă ‘lơ̆ng hơ iă. Rim bơngai tăh hla hôn bơnê kơtang rim Kơdră tang măt Kuô̆k hô̆i pơlei tơm Hồ Chí Minh hlôi đei lơ tơdrong jang hơdăh, mơ̆ng nơ̆r tơgop đơ̆ng bơngai tah hla pơlei tơm vă hơmet ăn dôm tơdrong hơdrol ‘măng hop akom mă 3 kơ Kuô̆k hô̆i jăl XV. Hăm rim tơdrong jang tĭh kơ tĕh đak, rim bơngai tăh hla tơbăt jơhngơ̆m đon lăng trŭh pơtôch Hop akŏm Trung ương 5 jăl XIII, lơ̆m au đei găh tơdrong groi tĕh, hơnơ̆ng atŏk kơtang tang găn sa pơgơ̆m pơjĭp.

Tơblơ̆ nơ̆r: Amazưt