VOV4.Bahnar - Pơgê năr 12/9, tơ̆ Hơnĭh bơ̆ jang Kơdră chĕp pơgơ̆r Tĕh đak, Kơdră chĕp pơgơ̆r tĕh đak pôk ăn Tơdrong tơchơ̆t tŏk grat Thượng tướng ăn kơ ƀok Phùng Sĩ Tấn, Kơ iĕng Kơdră jang tơgŭm Khŭl Ƀô̆ đô̆i kon pơlei Việt Nam.

Kơdră chĕp pơgơ̆r tĕh đak pôk ăn Tơdrong tơchơ̆t tŏk grat Thượng tướng ăn Kơ iĕng Kơdră jang tơgŭm Khŭl Ƀô̆ đô̆i kon pơlei Việt Nam

Kơdră chĕp pơgơ̆r lui păng ‘mĕh vă Thượng tướng Phùng Sĩ Tấn hơnơ̆ng vei kơ jăp păng atŏk kơtang jơhngơ̆m đon chĭnh trĭ kơ jăp, mĭnh nơ̆r mĭnh đon hăm trong bơ̆ jang kĕch mang kơ Đảng; atŏk kơtang hơnăp jang lơ̆m hŏk pơhrăm jơhngơ̆m đon kĕch mang kơ bơngai kang ƀô̆, đang viên, kơ kang ƀô̆ kơpal, tơgăl hăm hơnăn “Ƀô̆ đô̆i Ƀok Hô”. Kơdră chĕp pơgơ̆r Tĕh đak athei Thượng tướng Phùng Sĩ Tấn ling lang băt hơdăh dôm tơdrong, atŭm khŭl Kơdră dơnơm tơ iung pơjing Hơnĭh tơm Jang tơgum pran kơ jăp iăp kơtang, hơtŏ hăm tơdrong jang lơ̆m chăl hle, kiơ̆ yok rok jơng joăt joe nuih mơng “mĭnh nơ̆r ƀơ̆r đon, tơchăr hơgei, bơ̆ jang tơnăp, tơgoăt pôm ƀơ̆r đon, vang kơrŭn jơhngơ̆m iung jang jơnei”.

Tơblơ̆ nơ̆r: Amazưt