VOV4.Bahnar - Kơdră chĕp pơgơ̆r Tĕh đak Nguyễn Xuân Phúc ‘nao đei jơ pơma dơnŭh hăm Bơngai tang măt Việt Nam tơ̆ Thụy sỹ Philipp Rosler atŭm hăm ,khŭl hơnih mơdro sa Thụy Sỹ năm tơmang Việt Nam, tơchă rơvơn jang hơdoi mơdro sa vă atŏk kơtang jang hơdoi mơdro sa, tơmơt jên jang ƀar păh Việt Nam păng ƀar tĕh đak Đức, Thụy Sĩ.

Kơdră chĕp pơgơ̆r tĕh đak pơma dơnŭh hăm Bơngai tang măt Việt Nam tơ̆ Thuỵ Sĩ

Kơdră chĕp pơgơ̆r Tĕh đak ‘mĕh vă kơ dĭh ƀok Philipp Rosler hơnơ̆ng tơgŭm djru păng pơtrŭt tơdrong atŏk kơtang tơgoăt tơgoăl Jang hơdoi gĭt kăl Việt Nam – Đức, tơgoăt tơgoăl ‘lơ̆ng hơ iă jang hơdoi ƀar păh Việt Nam – Thụy Sỹ; chă hơvơn rim hơnĭh mơdro sa Đức, Thụy Sỹ păng châu Âu atŏk kơtang tơmơ̆t jên jang mơdro sa tơ̆ Việt Nam, mă kăl ‘nŏh lơ̆m tơplĭh ‘nao tơchăr păng jang kmăi kmŏk hơgei. Kơdră chĕp pơgơ̆r Tĕh đak jei ‘mĕh vă ƀok Philipp Rosler chă pơma athei păng pơtrŭt kơtang vă Thụy Sỹ hrôih kĭ Tơdrong tơchơ̆t Mơdro sa hiôk hian ƀar păh Việt Nam hăm Khŭl EFTA.

Tơblơ̆ nơ̆r: Amazưt