VOV4.Bahnar - Kơsơ̆ năr 22/8 tơ̆ Hơnĭh bơ̆ jang Kơdră chĕp pơgơ̆r tĕh đak, Kơdră chĕp pơgơ̆r tĕh đak sơng pơma dơnŭh hăm Kơdră chĕp pơgơ̆r Dơnŏ anĭh dăr lăng hơlen tơdrong yoch tơm kơ tĕh đak Lào Xay-xạ-nạ Khốt-phu-thon hăm Khŭl năm tơmang păng bơ̆ jang tơ̆ Việt Nam.

Kơdră chĕp pơgơ̆r tĕh đak sơng pơma dơnŭh hăm Kơdră chĕp pơgơ̆r Dơnŏ anĭh dăr lăng hơlen tơdrong yoch tơm kơ tĕh đak Lào

Tơ̆ jơ sơng, Kơdră chĕp pơgơ̆r Tĕh đak Nguyễn Xuân Phúc hmach chơt bơnê păng hôn bơnê kơ ƀok Xay-xạ-nạ Khốt-phu-thon Kơdră chĕp pơgơ̆r Dơnŏ anĭh bơ̆ jang Hơlen tơdrong yoch kơ tĕh đak Lào păng Khŭl kơdră tang măt năm ngôi, bơ̆ jang, vang Hop akŏm Dơnŏ anĭh bơ̆ jang dăr lăng hơlen tơdrong yoch rim dêh char đei trong hơdrar sơlam tĕh đak Việt Nam - Lào ‘măng mă 7 păng rim tơdrong jang kơkuh chơt hơ iă Sơnăm Tơgoăt tơgoăl gĭt kăl Việt Nam - Lào, Lào - Việt Nam 2022. Hôn bơnê kơ tang kơ Dơnŏ anĭh bơ̆ jang Dăr lăng hơlen tơdrong yoch ƀar tĕh đak đei tơbăt tơgoăl, jang hơdoi ‘lơ̆ng hơ iă, Kơdră chĕp pơgơ̆r tĕh đak akhan, ‘nau jing tơdrong tơm tơgŭm ăn ƀar păh tơbăt dĭh băl kơtơ̆ng ang păng trong jang gơ̆h hơgei lơ̆m rim tơdrong jang khôi luơ̆t adoi sơkơ̆t hơdăh: Việt Nam ling lang tơgŭm djru ăn Dơnŏ anĭh dăr lăng tơdrong yoch kơ Lào găh rim tơdrong; tơgŭm djru kon jên hŏk pơhrăm ăn kang ƀô̆ Dơnŏ anĭh bơ̆ jang Dăr lăng hơlen tơdrong yoch kơ tĕh đak Lào năm hŏk pơhrăm tơ̆ Việt Nam.

Tơblơ̆ nơ̆r: Amazưt