VOV4. Bahnar - Pơgê năr 11/8, tơ̆ Hà Nội, Kơdră chĕp pơgơ̆r Tĕh đak Nguyễn Xuân Phúc, Kơdră chĕp pơgơ̆r Dơnŏ anĭh pơrô̆ jang tơ iung pơjing Tơdrong vă jang “Trong kăl tơ iung pơjing păng pơm pơkeh Tĕh đak pháp quyền xã hội chủ nghĩa Việt Nam trŭh sơnăm 2030, lăng trŭh sơnăm 2045” pơm tơm jơ bơ̆ jang đơ̆ng Khŭl Kơdră chĕp pơgơ̆r Dơnŏ anĭh pơrô̆ jang hăm Jơnŭm Hơlen Trung ương.

‘Nau jing jơ bơ̆ jang tuch luch kơ Khŭl kơdră chĕp pơgơ̆r Dơnŏ anĭh pơrô̆ jang vă tơgoăt iŏk rim nơ̆r tơgop pơm pơkeh Tơdrong vă jang hơdrol pơtrŭh ăn Dơnŏ anĭh tơm Chĭnh trĭ. Kơdră chĕp pơgơ̆r Tĕh đak Nguyễn Xuân Phúc pơma hơdăh ‘moi kiơ̆ nơ̆r tơgop đơ̆ng rim hơnĭh bơ̆ jang, khŭl jang păng rim kơdră Dơnŏ anĭh pơrô̆ jang, lơ̆m au đei lơ nơ̆r tơgop đơ̆ng Jơnŭm Hơlen Trung ương, hlŏh lơ ‘măng hơmet ming, tơdrong vă pơjing Tơdrong vă jang hlôi đei dôm tơdrong hơmet gĭt kăl kiơ̆ trong hơdăh hlŏh kơ Tơdrong tơchơ̆t, trong pơchŏh jang gĭt kăl hơdăh hlŏh dơ̆ng. Kơdră chĕp pơgơ̆r Tĕh đak pơma hơdăh, tơ iung pơjing păng pơm pơkeh Tĕh đak pháp quyền xã hội chủ nghĩa Việt Nam ‘nŏh tơdrong jang tôch gĭt kăl, jing hơnăp jang kơtang hlŏh, mă lei jei trăp trĭn hlŏh mă pơ đĭ lơ̆m Đảng, kon pơlei bơ̆n kăl vang kơrŭn đĭ jơhngơ̆m iung jang keh đang lơ̆m lơ sơnăm kơnh.

Tơblơ̆ nơ̆r: Amazưt