Iung pơma tơ̆ jơ tơƀơ̆p, Kơdră tang măt Hàn Quốc tơ̆ Việt Nam tơbăt, Kơdră chĕp pơgơ̆r Teh đak Nguyễn Xuân Phúc ‘nŏh tơmoi kơ Teh đak mă blŭng kơ Khŭl kơdră chĕp pơgơ̆r tĕh đak găh Ƀok Kơdră tơm Yoon Seuk-yeol, đơ̆ng nŏh jei ƀô̆h hơdăh Hàn Quốc lăng kơ jăp tơgoăt tơgoăl jang hơdoi hăm Việt Nam.

Păh Hàn Quốc tôch hơmŏ ‘măng năm tơmang đơ̆ng Kơdră chĕp pơgơ̆r Teh đak trŭh au kơnh gô pơ̆ih trong rơvơn jang hơdoi lơ̆m lơ tơdrong kơ ƀar tĕh đak, mă kăl lơ̆m pơjing trong jang hơdoi găh tĕch răt tơmam drăm cham char păng kĭ pơkăp mĭnh ƀar hla bơar kăl lơ̆m rim tơdrong anai. Kơdră chĕp pơgở Tĕh đak Nguyễn Xuân Phúc tơbăt, ‘măng tơƀơ̆p au gô atŏk kơtang tơgoăt tơgoăl, hlôh vao dĭh băl, jing jơ ‘năr vă Kơdră chĕp pơgơ̆r Teh đak adoi nhen Kơdră chĕp pơgơ̆r rim hơnĭh bơ̆ jang Việt Nam hlô̆h vao hlŏh dơ̆ng găh tơdrong hơpơi ‘mĕh vă đơ̆ng kon pơlei bơngai Hàn Quốc.