VOV4.Bahnar - Pơgê năr 23/9, tơ̆ pơlei tơm Đà Nẵng, Dơnŏ anĭh Đảng pơlei tơm Đà Nẵng iung jang hơdoi hăm Viện Lịch sử Quân sự, Bộ Tư lệnh Quân khu 5 pơgơ̆r Hop akŏm khoa hŏk hăm hơnăn: “70 sơnăm jơnei rơngei Đồn Nhất - Hải Vân Quan - Gru kơnăl chăl sơnăm, trong ƀô̆h hơdăh găh tơ iung pơjing trong iung tơblăh”.

Kơdră chĕp pơgơ̆r Tĕh đak Nguyễn Xuân Phúc phĭn hơdoi hăm rim ƀô̆ đô̆i so tơ̆ Hop akom

Lơ̆m chăl sơnăm gĭt kăl kơ tĕh đak, jơnei rơngei Đồn Nhất - Hải Vân Quan tơƀô̆h ăn lơ trong pơgơ̆r gĭt kăl ăn khŭl ƀô̆ đô̆i Liên khu 5 lơ̆m prăt chăl sơnăm tơblăh vang tang găn Phalăng păng ayăt Mi tŏk pơjei tĕh đak. Jơnei au jing trong gĭt kăl hlŏh lơ̆m iung tơblăh kơđông đơ̆ng ƀô̆ đô̆i păng kon pơlei Tơring 5, pơih trong iung tơblăh hle lơ̆m groi tĕh bri kông hông hang krang nak sĕk kơloĕk, hơnĭh kơ ‘nơp kơ ayăt tôch kơ jăp păng đei ƀrơ̆m phao kơtoang lơ; Jơnei Đồn Nhất hlôi tơbô̆h hơdăh trong iung jang gơ̆h hơgei nuih mơng ƀar păh iung tơblăh hăm bơ̆ jang chĭnh trĭ, ƀar păh iung tơblăh đơ̆ng ƀô̆ đô̆i tơm hăm jơhngơ̆m pran đơ̆ng kon pơlei păng atŏk tơ iung khul yu kĕch tơring. Hop akŏm ‘nŏh jơ ‘năr vă lăng dơ̆ng dôm tơdrong gĭt kăl lơ̆m ‘măng tơblăh vang hrang tơƀet kơ hơdrĕch hơdrung, tơƀô̆h tơbăt dơ̆ng dôm tơdrong kơnăl lơ̆m khoa hok, pơm hơdăh hlŏh dơ̆ng hơnăp jang trong ‘lơ̆ng kon pơlei vang iung tơblăh vang vei lăng Tĕh đak.

Tơblơ̆ nơr: Amazưt