VOV4.Bahnar - Pơgê năr 7/2, tơ̆ Hà Nam, Kơdră chĕp pơgơ̆r Tĕh đak Nguyễn Xuân Phúc vang năm pơm lêh Iung jang Tơdrong vă jang Mă II găh tơdrong vă jang ming man trong gre Hà Nội-Hải Phòng hăm trong glung rĕnh Cầu Giẽ - Ninh Bình.

Kơdră chĕp pơgơ̆r Tĕh đak hăm rim kơdră tang măt vang kơtĭt kmăi iung jang

Tơdrong jang jăl mă 2 đei kon jên tơmơ̆t jang 702 ty 820 trĭu hlak jên, trong kơ jung 16km 300 met, kơ yuơ Dơnŏ anĭh vei lăng trong gre nơnăm dêh char Hà Nam pơm tơngla tơmơ̆t jên jang, hơnĭh iŏk ming man ‘nŏh Dơnŏ anĭh tơ iung pơjing ming man Xuân Trường. Khei ‘năr jang keh đang lơ̆m sơnăm 2023. Iung pơma tơ̆ jơ pơm lêh, Kơdră chĕp pơgơ̆r Tĕh đak Nguyễn Xuân Phúc pơma hơdăh găh tơdrong tơƀư̆h trong grĕnh au, ư̆h khan lăp tơgum ăn trong yak hiôk hian ăn hơnĭh tơm Hà Nội mă lei oei pơm ‘lơ̆ng ăn tơƀư̆h trong nơnăm, hơvơn tơmơt jên jang păng pơ̆ih să atŏk tơ iung mơdro sa, tơmang pơ hiơ̆, tơring kơdrơ̆m kơ tơring Tơmăn găh Tu. Kơdră chĕp pơgơ̆r Tĕh đak athei Dơnŏ anĭh tơm vei lăng Trong gre nơnăm, dêh char Hà Nam, tơngla tơmơt jên jang, rim tơngla iŏk jang kăl hlô̆h vao tôm tong hơnăp jang hăm tơdrong jang, ming man kơ jăp ‘lơ̆ng, ƀlep pơkăp, tang găn sa pơgơ̆m pơjĭp lơ̆m tơmơ̆t jên jang, ming man.

Tơblơ̆ nơ̆r: Amazưt