Sơng iŏk nơ̆r krao hơvơn đơ̆ng Kơdră chĕp pơgơ̆r Kuô̆k hô̆i Vương Đình Huệ, Kơdră chĕp pơgơ̆r Thượng viện Campuchia Samdech Say Chhum chĕp kơ̆l Khŭl Kơdră tang măt Thượng viện Campuchia năm trŭh tơ̆ Hơnĭh tơm Hà Nội iung năm tơmang Việt Nam đơ̆ng năr 24 trŭh năr 26/10.

Kơdră chĕp pơgơ̆r Thượng viện Campuchia Samdech Say Chhum

‘Nau tơdrong jang chĭnh trĭ gĭt kăl ƀar păh Kuô̆k hô̆i Việt Nam păng Thượng viện Campuchia lơ̆m sơnăm 2022 ‘nŏh “Sơnăm tơgoăt tơgoăl Việt Nam - Campuchia, Campuchia - Việt Nam”, ƀlep lơ̆m năr tơbăt 55 sơnăm Năr pơjing tơbôl ƀar tĕh đak (24/6/1967), tơgop atŏk kơtang tơklep dĭh băl, lui kiơ̆ dĭh băl kơ jăp chĭnh trĭ ƀar păh Đảng, ƀar Tĕh đak păng ƀar Hơnĭh bơ̆ jang pơjing Khôi luơ̆t. ‘Măng năm tơmang đơ̆ng Thượng viện Campuchia Samdech Say Chhum ‘măng mă au ‘nŏh jing jơ ‘năr vă ƀar păh pơma dơnŭh, hơlen găh pơtôch jang hơdoi ƀar păh Dơnŏ anĭh bơ̆ jang Khôi luơ̆t lơ̆m khei năr au ki, tơgop hơmet pơ ‘lơ̆ng păng atŏk kơtang hlŏh dơ̆ng tơgoăt tơgoăl dĭh băl ‘lơ̆ng liĕm, kơ jăp, tôm tong, kơ jăp 'lơ̆ng đunh đai tai sơnăm ƀar păh tĕh đak.