VOV4.Bahnar - Gơmăng năr 17/8, Dơnŏ anĭh Đảng,. Kơdră chĕp pơgơ̆r phương Quán Thánh, quận Ba Đình, pơlei tơm Hà Nội pơgơ̆r “Năr lêh đĭ đăng kon pơlei vang vei lăng sơđơ̆ng tĕh đak”. Đại tướng Tô Lâm, Kơdră chĕp pơgơ̆r Dơnŏ anĭh tơm Kŏng ang vang năm păng iung pơma lơ̆m năr lêh.

Đại tướng Tô Lâm iung pơma tơ̆ năr lêh

17 sơnăm au ki, “Năr lêh đĭ đăng kon pơlei vang vei lăng sơđơ̆ng tĕh đak” kơ phường Quán Thánh hlôi tơlĕch lơ tơdrong jang ‘lơ̆ng hơ iă, jơnei păng đei lang să kơtang, đơ̆ng nŏh kiơ̆ yok đei jơhngơ̆m pran đơ̆ng pơ đĭ khŭl jang chĭnh trĭ lơ̆m jang kiơ̆ bơ̆ jang vei lăng Tĕh đak, sơđơ̆ng tơring tơpôl. Iung pơma tơ̆ năr lêh, ƀok Tô Lâm hôn bơnê dôm tơdrong iŏk đei jơnei mă kang ƀô̆, kon pơlei phường Quán Thánh hlôi iŏk đei lơ̆m pơjing tơdrong jang đi đăng kon pơlei vang vei lăng sơđơ̆ng tĕh đak khei năr au ki. Ƀok Tô Lâm akhan hlŏh đơ̆ng ‘măng pơgơ̆r Năr lêh đĭ đăng kon pơlei vang vei lăng sơđơ̆ng tĕh đak đei ƀô̆h jơ ‘năr chơt hơ iă, jơhngơ̆m đon tơgoăt tơgoăl păng tơdrong tơgŭm djru, lui kiơ̆ kơ jăp đơ̆ng kon pơlei lơ̆m tơdrong chĕp pơgơ̆r đơ̆ng đảng păng khŭl kơdră tơring păng khŭl kŏng ang tơring; kon pơlei đei iung jang pơm tơm kơ dĭh, kơchăng kơtang vang iung jang đĭ đăng kon pơlei vang vei lăng sơđơ̆ng tĕh đak pơjing đei jơhngơ̆m pran tĭh tên, tơgop kơ jăp iăp kơtang sơđơ̆ng ăn rim tơdrong.

Tơblơ̆ nơ̆r: Amazưt