VOV4.Bahnar - Drung kơsơ̆ năr 30/5, tơ̆ Hnam Kuô̆k hô̆i, Kơdră chĕp pơgơ̆r Kuô̆k hô̆i Vương Đình Huệ hlôi sơng pơma dơnŭh hăm Kơdră tang măt Tĕh đak Anh tơ̆ Việt Nam Gareth Ward.

Tơ̆ jơ tơ ƀơ̆p, Kơdră chĕp pơgơ̆r Kuô̆k hô̆i Vương Đình Huệ hôn bơnê kơtang tơdrong atŏk tơ iung ‘lơ̆ng hơ iă lơ̆m tơgoăt tơgoăl jang hơdoi ƀar păh Kuô̆k hô̆i Việt Nam hăm Nghị viện Anh dôm sơnăm au ki. Ƀar păh vei kơ jăp ăn khul kơdră chă tơ ƀơ̆p, pơma dơnŭh dĭh băl tơ̆ rim ‘măng pơgơ̆r nghĭ viê̆n lơ pang, mă kăl tơ̆ Jơnŭm atŭm Nghĭ viê̆n apŭng plĕnh tĕh (IPU), Hop akŏm Jang hơdoi Nghĭ viê̆n Á - Âu (ASEP). Pơma hơdăh, tơdrong jang hơdoi jơnei ƀar păh Kuô̆k hô̆i ƀar tĕh đak ‘nŏh jing tơdrong kăl hlŏh tơgop gĭt kăl pơtrŭt kơtang hlŏh dơ̆ng Jang hơdoi gĭt kăl Việt Nam - Anh, Kơdră chĕp pơgơ̆r Kuô̆k hô̆i Vương Đình Huệ ‘mĕh vă, Kơdră tang măt Gareth Ward hơnơ̆ng pơm gơng tơrŏh klŏh klĕch ăn atŏk kơtang tơgoăt tơgoăl jang hơdoi ƀar păh Kuô̆k hô̆i, tơlĕch athei pơjing rim tơdrong jang hơdoi lăng trŭh tơbăt 50 sơnăm pơjing tơbôl ƀar tĕh đak lơ̆m sơnăm 2023.

Tơblơ̆ nơ̆r: Amazưt