Lơ̆m 5 sơnăm âu ki, lơ khŭl tơpôl, rim bơngai kơ Anih pơtho pơhrăm hlôi đei: Kơdră teh đak pôk hơpăh Mê đai rim kơloăi, pôk hơpăh hơnăn Bơngai pơtho hŏk Kon pơlei, Bơngai pơtho hŏk Gơh hơgei; Thủ tướng Teh đak hơpăh Hla kơ pơjei băl đơ̆ng khŭl kơdră teh đak, Ƀăng khen; Kơdră tơm vei lăng găh Pơtho pơhrăm hơpăh hla kơ pơjei băl đơ̆ng Anih tơm păng Ƀăng khen...

Hơtŏk dôm jơnei iŏk đei, hơnăp kơnh, Anih tơm vei lăng găh Pơtho pơhrăm hơvơn jơhngơ̆m pran akŏm đơ̆ng rim kơdră đảng, khŭl grŭp lơ̆m tơdrong tơlĕch jang tơdrong jang pơjei băl, pôk hơpăh. Đĭ đăng anih Pơtho pơhrăm pơjei băl tơplih ‘nao hơgei, hơtŏk ‘lơ̆ng pơtho pơhrăm, pơtho bơngai jang gơh hơgei hloh, pơm lăp hăm ‘meh vă hơtŏk tơiung teh đak jăl jang 2025-2030, kiơ̆ đơ̆ng noh pơlung, pơtrŭt khŭl thây kô pơtho, bơngai pơtho, bơngai jang, hŏk tro, sinh viên mĭnh ƀơ̆r đon, hơmet ‘lơ̆ng pơmat tat, hơdrin jang đang ‘lơ̆ng hơnăp jang đei pơjao.