VOV4.Bahnar - Kơsơ̆ năr 27/4, Khŭl bơ̆ jang kơ Dơnŏ anĭh bơ̆ jang vei lăng Kon kông kơ yuơ Kơdră dơnơm, Kơdră chĕp pơgơ̆r Dơnŏ anĭh vei lăng Kon kông Hầu A Lềnh, pơm kơdră khŭl hlôi bơ̆ jang hăm Dơnŏ anih vei lăng kon pơlei dêh char Gia Lai găh bơ̆ jang vei lăng kon kông păng atŏk tơ iung mŭk drăm-tơpôl tơring kon kông păng groi kông.

Hăm tơdrong jang Tĕh đak atŏk tơ iung mŭk drăm-tơpôl tơring kon kông păng groi kông jăl jang 2021-2025, dêh char Gia Lai apĭnh, athei Trung ương tơgŭm djru vă jê̆ 6.000 ti hlak jên vă dêh char tơlĕch jang kiơ̆ rim trong jang vei lăng erĭh sa, tơpôl, bơ̆ jang tơjur dơnŭh. Tơ̆ jơ bơ̆ jang, ƀok  Hầu A Lềnh akhan, Gia Lai hlôi lăng ba kơ jăp trŭh tơ̆ kon kông. Dêh char hlôi đei trong jang kăl atŏk tơ iung mŭk drăm tơpôl tơring kon kông. Ƀok Hầu A Lềnh athei Gia Lai lăng trŭh tơmơ̆t jên jang trŏ ƀlep hlŏh dơ̆ng ăn tơring kon kông, akŏm lơ̆m dôm tơdrong hơmet pơ ‘lơ̆ng dơnŭh hin.

Tơblơ̆ nơ̆r: Amazưt