VOV4. Bahnar - Pơgê năr 17/1, tơ̆ dêh char Quảng Ngãi, ƀok Võ Văn Thưởng, Kơdră jang lơ̆m Dơnŏ anĭh tơm Chĭnh trĭ, Kơdră chĕp pơgơ̆r Ban Bí thư atŭm hăm Khŭl bơ̆ jang Trung ương hlôi năm ngôi, hmach Têt ăn kơdră chĕp pơgơ̆r, Kơdră so chĕp pơgơ̆r dêh char Quảng Ngãi; pôk tơmam drăm Têt ăn ŭnh hnam lôch dŏng tĕh đak, ŭnh hnam đei iŏk yua ăn tĕh đak, bơngai rơka dŏng tĕh đak, ƀô̆ đô̆i nuih mơng păng ŭnh hnam dơnŭh tơ̆ apŭng Minh Long.

Iung pơma tơ̆ jơ tơ ƀơ̆p mŭh măt, Kơdră chĕp pơgơ̆r Ban Bí thư Võ Văn Thưởng hôn bơnê dôm tơdrong tơgop gĭt kăl đơ̆ng rim kang ƀô̆ kĕch mang, kơdră so chĕp pơgơ̆r dêh char Quảng Ngãi rim jăl, tơgop kơtang lơ̆m tơdrong jang tơ iung pơjing păng atŏk tơ iung tơring, tĕh đak. Kơdră chep pơgơ̆r Ban Bí thư Võ Văn Thưởng lui akhan, hăm tơdrong tơgoăt mĭnh ƀơ̆r đon, hơdrin đơ̆ng Hơnĭh đảng, kơdră chĕp pơgơ̆r păng kon pơlei, dêh char Quảng Ngãi gô đei lơ trong iung jang pran kơtang hlŏh dơ̆ng lơ̆m khei năr kơnh.

Tơblơ̆ nơ̆r: Amazưt