Kơdră Kuô̆k hô̆i hlôi năm tơmang Hnam kơmăi pơm tơlĕch gre điê̆n Xiaomi Păng Hơnih jang Thị Nguyên (CVTE); năm tơmang lăng hơnih pơdah tơmam drăm, hơnih pơm tơlĕch gre điê̆n atŭm hăm lơ kơmăi kơmŏk yua  AI lơ̆m tơdrong jang kơ CVTE. Kơdră Kuô̆k hô̆i hmach bơnê kơ dôm tơdrong jang hơtŏk 'lơ̆ng kơ Xiaomi păngCVTE; ăn tơbăt, Việt Nam hơnơ̆ng sơng drơ̆ng mưh dôm hơnih jang mŭk drăm gơh hơgei năm chă hơlen asong jang, pơih să tơdrong jang hơdoi, mă kăl noh gah tơdrong pơm tơlĕch gre điê̆n, pin, kơmăi kơmŏk răk unh hơyuh, tơdrong hơgei trĭ tuê̆ nhơ̆n tăo, kơmăi kơmŏk 'nao rơgei nai.

Kơdră Kuô̆k hô̆i Trần Thanh Mẫn sơkơ̆t hơdah, Kuô̆k hô̆i Việt Nam hơnơ̆ng tơrĕk keh đang khôi luơ̆t, hơtŏk 'lơ̆ng tơdrong asong jang, tĕch pơdro kiơ̆ pơkăp sơđơ̆ng 'lơ̆ng, vei sơđơ̆ng tơdrong pơyua trŏ ƀlep kơ rim hơnih asong jang; kơchăng tơmơ̆ng dôm nơ̆r pơtruh trŏ ƀlep đơ̆ng hơnih jang mŭk drăm, pơtoi keh đang chih akŏm khôi luơ̆t, pơm trong hiôk ăn hơnih jang mŭk drăm teh đak đe asong pơm jang đunh khei năr, jang đei jơnei tơ̆ Việt Nam, pơm kiơ̆ trŏ khôi luơ̆t păng vei sơđơ̆ng tơdrong pơyua hơtŏ hơnơ̆ng đơ̆ng rim pah.