Pơma ăh Hop akŏm, Kơdră Kuôk hô̆i Vương Đình Huệ tơbăt tơdrong kăp gĭt lơ̆m 'măng năm tơmang âu ki đơ̆ng Thủ tướng New Zealand truh Việt Nam, ƀar teh đak hlôi kĭ pơkăp jang hadoi đơ̆ng Anih tơm Pơtho pơhrăm Việt Nam - New Zealand, kiơ̆ Kơdră Kuôk hô̆i, âu jing tơdrong tơchơ̆t kăp gĭt vă ƀar teh đak hơtŏk jang hadoi pơtho pơhrăm ưh adrô̆ đơ̆ng Khul Kơpal teh đak hăm dih băl, đơ̆ng anih jang tơm hăm anih jang tơm mă oei tơroh jang hadoi đơ̆ng dôm anih jang pơtho pơhrăm hăm dih băl.

Ră hơdăh tơdrong jang hadoi găh pơtho pơhrăm hăm New Zealand gô tơguăt pơtho nơ̆r Anh, Kơdră Kuôk hô̆i ăn tơbăt, âu jing minh tơdrong hiôk mă ưh kơsĭ teh đak mă yơ adoi đei ôh; atŭm hăm noh hơpơi 'moih Hop akŏm gô pơih pơjing minh jăl 'nao ăn tơdrong jang hadoi pơtho pơhrăm đơ̆ng ƀar teh đak Việt Nam - New Zealand.