Pơgê ‘năr 22/11, lơ̆m jơnăr năm ngôi bơ̆jang tơ̆ teh đak Campuchia, Kơdră Kuôk hô̆i Vương Đình Huệ păng Khŭl tang măt gĭt kăl kơ Kuôk hô̆i teh đak bơ̆n hlôi sơng Phŏ kơdră chĕp kơ̆l dêh char Kampong Thom; năm ngôi, bơ̆jang hăm kŏng ti găh Grŭp jang Kơsu Việt Nam tơ̆ dêh char Kampong Thom, teh đak Campuchia. Tơ̆ jơ bơ̆jang hăm Kŏng ti kơsu Tân Biên, Kơdră Kuôk hô̆i Vương Đình Huệ tơƀôh đon chhôk hơiă ƀơ̆t  năm brih dôm kơ dơ bri kơsu  jing ‘lơ̆ng, glơch glach. Tơdrong jing ‘lơ̆ng ‘noh tơƀôh hơdăh tơdrong hơiă ăn tơdrong pơvei 2 teh đak Việt Nam păng Campuchia.

Kơdră Kuôk hô̆i pơma hơdăh, dôm jơnei ‘lơ̆ng hơiă hlôi iŏk đei ‘ngoăih tơdrong hơdrin đơ̆ng Khŭl kơdră chĕp kơ̆l păng tơpôl kang ƀô̆ bơngai jang Kŏng ti oei athei tơroi truh tơdrong tơgŭm, jang hơdai, pơm tơdrong hiôk đơ̆ng Khŭl kơdră chĕp kơ̆l teh đak Campuchia, mă kơtă ‘noh jĭ khŭl kơdră chĕp kơ̆l dêh char Kampong Thom. Ƀlep ƀơ̆t ‘măng âu, Kơdră Kuôk hô̆i lăng ‘lơ̆ng păng bơnê kơkhŭl kơdră chĕp kơ̆l dêh char, rim anih jang kơ dêh char, apŭng hlôi tơgŭm pơm tơdrong hiôk ăn tơdrong jang đơ̆ng Kŏng ti.