Tơ̆ hơnih tah kơphĭu kơ phương Hải An, pơlei tơm Hải Phòng, Kơdră Kuô̆k hô̆i Trần Thanh Mẫn tơrĕk, rim hơnih pôk rơih athei băt hơdah dôm tơdrong tơchơ̆t, vă pơm jang mă trŏ ƀlep, ưh lê̆ đei tơdrong yoch glăi; mă kăl ưh gơh pơhơi pơhŏ hăm rim tơdrong kăl ayơ lơ̆m pơkăp; atŭm hăm noh pơm trong hiôk hloh ăn kon pơlei tah hla năm tah kơphĭu hrôih, kơtă.

Kơdră Kuô̆k hô̆i Trần Thanh Mẫn akhan, ou jĭ 'măng pôk rơih mă blŭng iŏk yua jơ̆p jang tơdrong tơplih kơmăi kơsô̆ đơ̆ng Trung ương truh tơring lơ̆m tơdrong chih hơnăn bơngai tah hla păng hô sơ bơngai lĕch măt tơgar. Yuơ noh adoi oei đei lơ tơdrong tơnap tap, noh rim hơnih jang kơpal athei jang adoi kơjăp hloh. Kơdră Kuô̆k hô̆i tơrĕk, pơlei tơm Hải Phòng athei kơchăng sek tơlang hla bar pơtruh tơtom, trŏ tơchơ̆t, trŏ khei năr: dăr hơlen tơpôl lơ̆m năr hơdrol pôk rơih trŏ nhen tơlĕch jang đơ̆ng năr 02/3/2026 truh năr 14/3/2026; tơdrong tơroi tơbăt athei đei jang tôm tong truh hăm kon pơlei.