Kiơ̆ tơdrong hơlen chih akŏm đơ̆ng Anih tơm Choh jang xa păng Cham char, truh dang ei hlôi đei 18 dêh char, pơlei tơm ƀơm răm kơtang kơyuơ 'mi kial kơsô̆ 10 pơm đei. 'Mi kial kơsô̆ 10 hlôi pơm tŏ sĕt jat noh 34 'nu bơngai lôch păng 20 'nu hiong dang ei tam mă chă ƀôh; atŭm hăm noh 40 'nu rơka. 153 tŏ hnam kon pơlei tơpăi hư răm pơđĭ; hloh 154.000 tŏ hnam hư răm, tơpăr bơbŭng. Choh jang xa răm tih tên hăm jê̆ 49.000 ha ƀa păng tơmam pơtăm ƀơm đak lơ̆p; 1.524 tŏ kon tơrong, 381.000 tŏ iĕr bip lôch, dah mă đak tơhiu.

Vang glơng hăm dôm tơdrong tơnap tap, hiong răm đơ̆ng kon pơlei păng dôm tơring, akŏm đon bơnôh băt 'mêm dih băl, hla 'lơ̆ng bơ̆ng hla hyah, Anih jang kơ Kuôk hô̆i pơgơ̆r lêh tơgop tơgŭm kon pơlei tơ̆ tơring ƀơm răm. Kiơ̆ kơ noh, rim Bơngai jang tang măt ăn Kuôk hô̆i juăt jang; Kang ƀô̆, bơngai jang tơ̆ Anih jang Kuôk hô̆i; Anih jang gah Kon kông păng rim Anih jang kơ Kuôk hô̆i hăm kơsô̆ jên pơkăp tơgop noh  600 triu hlj.