Đơ̆ng rŏng kơ truh Anih tơm Dakar, teh đak Senegal, Kơdră Kuôk hô̆i Trần Thanh Mẫn păng Hơkăn ƀok atŭm hăm Khul Kơpal kơ teh đak bơ̆n hlôi tơƀơ̆p, pơma dơnuh hăm kang ƀô̆ tơ̆ Anih jang tang măt, kon pơlei Việt Nam tơ̆ teh đak ou, vă tơroi gah tơdrong jang bơngai Việt Nam tơ̆ teh đak đe lơ̆m chăl sơnăm 'nao.

Lơ̆m 'măng năm tơmang teh đak Senegal 'măng mă ou, Kơdră Kuôk hô̆i Trần Thanh Mẫn păng Hơkăn ƀok atŭm hăm Khul Kơpal kơ teh đak bơ̆n gô pơma đam hăm đe kơdră kơpal kơ teh đak Senegal; năm akŏm Lêh kĭ tơchơ̆t hla bar pơkăp jang hơdoi kơ 2 Kuôk hô̆i; Năm akŏm lêh tơbang pơjing Grŭp ngĭ sih tơbôl Việt Nam – Senegal; Năm akŏm tơdrong pơma đam gah tơchơ̆t khôi luơ̆t hơtŏk jang hơdoi choh jang xa, tĕch pơdro, asong jang Việt Nam – Senegal.