Tơmơ̆ng dôm nơ̆r tơgop đơ̆ng kon pơlei Việt Nam tơ̆ Mông Cổ, tang măt ăn kơdră Đảng, Teh đak, Kơdră Kuô̆k hô̆i Trần Thanh Mẫn pơtruh hăm kang ƀô̆, bơngai jang tơ̆ Hơnih jang tang măt păng kon pơlei Việt Nam tơ̆ Mông Cổ nơ̆r apinh jet gia pơma dơnuh, nơ̆r thơ thou grăng pran păng nơ̆r thơ thou 'lơ̆ng hơ-iă.

Ră hơdah Đảng păng Teh đak hơnơ̆ng keh đang tơchơ̆t tơgŭm hăm bơngai Việt Nam tơ̆ teh đak đe, Kơdră Kuô̆k hô̆i ăn tơbăt, dôm nơ̆r pơtruh, tơdrong tơnap tap kơ kon pơlei gô đei rim hơnih jang kơpal lơ̆m teh đak jang hơdoi hăm Hơnih jang tang măt hơlen lăng vă gơh đei dôm trong jang trŏ ƀlep hơtŏk jang tơbôl kơ 2 teh đak adoi nhen tơgŭm 'lơ̆ng hloh ăn kon pơlei Việt Nam tơ̆ Mông Cổ.