Iung pơma pơgơ̆r, Kơdră Kuô̆k hô̆i Trần Thanh Mẫn ră hơdah, tơdrong jang hơmet ăn pôk rơih truh dang ei trŏ nhen tơchơ̆t đơ̆ng khôi luơ̆t, jang drơ̆ng minh kơjăp. Lơ dêh char, pơlei tơm jang tơnăp, tơroi tơtom nhen Thái Nguyên, Bắc Ninh, Hà Nội, Hải Phòng, Lạng Sơn, Đà Nẵng, Lâm Đồng, Đăk Lăk, An Giang.

Kơdră Kuô̆k hô̆i tơrĕk hăm Hơnih tơm Nô̆i vŭ hơtŏk hơlen tơdrong in kơphĭu pôk, hla bar chih akŏm tơdrong hơrih jang xa kơ bơngai lĕch măt tơgar, ưh đei lê̆ yoch glăi; hơtŏk kơtang tơdrong yua kŏng ngê̆ thŏng tin, chă akŏm pơma dơnuh hăm kon pơlei tah hla, akŏm trư̆k tuyê̆n vă pơih să tơring vang akŏm. Khei năr truh, tơlĕch tơchơ̆t noh ưh gơh pơhơi pơhŏ, athei pơgơ̆r tơnăp dôm tơdrong hop akŏm pơma dơnuh hăm kon pơlei tah hla, vei sơđơ̆ng hơtŏ hơnơ̆ng, trŏ luơ̆t.