Kơdră Kuô̆k hô̆i Vương Đình Huệ athei đĭ đăng kăn ƀô̆, linh công an dêh char hơnơ̆ng năm hơdrol, jang tơnăp ‘lơ̆ng, hlôh vao kơjăp păng pơgơ̆r jang kiơ̆ ‘lơ̆ng Tơdrong chơ̆t đơ̆ng Hop akŏm mă XIII kơ Đảng păng dôm tơdrong tơchơ̆t, nơ̆r pơtho đơ̆ng Đảng găh pơjing khul linh công an.

Kơdră Kuô̆k hô̆i athei, khul linh Công an dêh char Lào Cai hơtŏk hơnăp jang tơm lơ̆m tơdrong pơjing Tơdrong jang đĭ đăng kon pơlei vang vei sơđơ̆ng tĕh đak; hơtŏk tơdrong krao hơvơn kon pơlei hơdai hăm pơjing tơdrong jang kon pơlei vei lăng ‘lơ̆ng tơdrong sơđơ̆ng; hơnơ̆ng pơm hơtŏk păng tưk tơiung tơdrong vei ‘lơ̆ng tơdrong arih xa tơpôl, tơgŭm ăn kon pơlei tơ̆ tơring atăih yăih, tơring sơlam, tơring mơmat tat dêh hlŏh hăm jơhngâm đon “ưh đei hŭt hơchăng bu tơ̆ rŏng”. Mă loi ƀât têt âu kơnh athei pơm ‘lơ̆ng ăn kon pơlei sơng xa têt sơđơ̆ng ‘lơ̆ng, đei 1 pơ yan puih mak phĭ  tơtŏ dơnŏ ‘lơ̆ng, hiôk chơt.