VOV4.Bahnar  – Kơsơ̆ măng năr 24/1, ƀơ̆t hơmet xơng Têt Nhâm Dần 2022, Kơdră Kuôk hô̆i Vương Đình Huệ păng Khul kơpal kơ Trung ương hlôi năm akŏm tơdrong “Puih mak xơlam teh tơnŏ jơhngơ̆m đon kon pơlei dơxĭ” tơ̆ Anih linh vei xơlam teh Rạch Gốc, apŭng Ngọc Hiển, dêh char Cà Mau. Pơma tơ̆ 'măng Akŏm, Kơdră Kuôk hô̆i Vương Đình Huệ chơt hơ iă ƀôh hơdăh, mă tơdrong erih oei lơ tơnap tap, đe kang ƀô̆ Ƀô̆ đô̆i Vei xơlam teh Cà Mau pơma atŭm, Anih linh vei xơlam teh Rạch Gốc pơma adrô̆, hơnơ̆ng vei xơđơ̆ng xơlam teh, tơguăt tơguăl, drơ̆ng minh, tơlĕch dôm trong jang vă vei kơjăp, băt hơdăh dôm tơdrong jang tơring xơlam teh, vei kơjăp achon teh đak dơxĭ kơ dêh char. Kơdră Kuôk hô̆i Vương Đình Huệ ră hơdăh, mă kăl lơ̆m khei Têt Nguyên đán Nhâm Dần truh âu kơnh, kang ƀô̆ linh kơ dôm anih Linh vei xơlam teh dêh char Cà Mau hlôi jang atŭm kơjăp hăm dôm jăl pơgơ̆r, tơrĕk tơgŭm Têt ăn kon pơlei dôm xăh tơter đak dơxĭ; tơrĕk tơgŭm dôm unh hnam tơgŭm jơhngơ̆m hăm kăch mạng, unh hnam mă teh đak tơchơ̆t tơgŭm, unh hnam hin dơnuh, đe hơ ioh, hŏk tro lơ̆m jâ̆p tơring đei xơng puih mak tơnŏ tôm tong, păng jơnap.

Tơ̆ 'măng Akŏm, Kơdră Kuôk hô̆i Vương Đình Huệ păng Khul Kơpal kơ Trung ương hlôi pơjao 750 tơpu tơmam ăn Anih Linh vei xơlam teh Rạch Gốc, dôm khul jang tơjră pơrang jĭ, unh hnam mă teh đak tơchơ̆t tơgŭm, unh hnam hin dơnuh tơnap tap tơ̆ apŭng Ngọc Hiển.

- Hơdrol kơ ‘nŏh, Kơdră chĕp pơgơ̆r Kuô̆k hô̆i Vương Đình Huệ hlôi năm ngôi, hmach Têt rim kang ƀô̆, ƀô̆ đô̆i Tiểu đoàn U Minh 2 păng rim đoàn viên, bơngai jang tơ̆ tơring Phong Điền, apŭng Trần Văn Thời, dêh char Cà Mau. Tiểu đoàn U Minh 2 ‘nŏh jing Khŭl iung tơblăh kơ dêh char, jing hơnĭh tơm hlŏh lơ̆m tơblăh vang kơ khŭl bô̆ đô̆i păng kon pơlei Cà Mau lơm tơblăh ayăt Mi dŏng tĕh đak, ‘măng tơblăh vei lăng sơlam tĕh đak tơ̆ Tây Nam păng bơ̆ jang tơdrong jang apŭng plĕnh tĕh tơgŭm ăn tĕh đak boăl Campuchia. Iung pơma tơ̆ Tiểu đoàn U Minh 2, Kơdră chĕp pơgơ̆r Kuô̆k hô̆i Vương Đình Huệ hôn bơnê dôm tơdrong iŏk đei jơnei mă hơnih au iŏk đei, ‘mĕh vă rim kang ƀô̆, ƀô̆ đô̆i hơnơ̆g vei kơ jăp jơhngơ̆m đon kĕch mang, pơm jŭk yŭk trong hơlau, jang keh đang ‘lơ̆ng rim tơdrong jang đei Đảng, Tĕh đak păng kon pơlei lui kiơ̆ pơjao ăn.

Tơblơ̆ nơ̆r: Lan - Amazưt