Gơmăng hei (29/11-kiơ̆ jơ tơ̆ nŏh), Kơdră Kuô̆k hô̆i Vương Đình Huệ păng Khul tang măt Kuô̆k hô̆i tĕh đak bơ̆n truh tơ̆ cham gre păr khul linh Fairbain, anih tơm Canberra pơtơm năm hơpong tơ̆ Australia kiơ̆ nơ̆r krao đơ̆ng Kơdră Hạ viện Australia Milton Dick, Kơ dră Thượng viện Australia, Sue Lines.

‘Măng năm hơpong tơ̆ Australia đơ̆ng Kơdră Kuô̆k hô̆i Vương Đình Huệ păng Khul tang măt Kuô̆k hô̆i tĕh đak bơ̆n mă âu gô tơgop pơm hơtŏk hlŏh dơ̆ng tơdrong pơvei, jang hơdoi gĭt kăl đơ̆ng 2 tĕh đak pơma atŭm, tơdrong pơvei đơ̆ng kơdră chĕp kơ̆l 2 tĕh đak pơma adrô̆, hơtŏk hlŏh dơ̆ng tơdrong jang hơdoi đơ̆ng anih chih pơjing luơ̆t kơ tĕh đak.

Atŭm hăm ‘nŏh, ‘măng năm hơpong vang tơgop pơm hơtŏk tơdrong pơvei 2 pang lơ̆m rim tơdrong, mă loi jĭ găh mŭk drăm, tĕch mơdro, tơmât jên jang, pơtho pơhrăm, khul linh, vei sơđơ̆ng tĕh đak. Lơ̆m ‘măng năm hơpong âu, Kơdră Kuô̆k hô̆i Vương Đình Huệ vă truh tơƀâp, pơma nuh, pơma đam hăm dôm kơdră chĕp kơ̆l tĕh đak Australia; vang truh Hop akŏm jang hơdoi mŭk drăm, Hop akŏm jang hơdoi găh pơtho pơhrăm, năm ngôi tơ̆ 1,2 hnam trưng đăi hŏk, tơƀâp, pơma nuh hăm tơpôl bơngai Việt tơ̆ Australia.