Tơ̆ jơ pơma đam, Kơdră  Kuôk hô̆i Vương Đình Huệ lui ngeh hăm tơdrong pơgơ̆r đơ̆ng ƀok kơdră teh đak, kơdră Thươ̆ng viê̆n păng kơdră Hă viê̆n, teh đak Philippines gô roi năr roi jơnap pơdrŏng; xơnong jang păng anih dơ̆ng roi năr roi kơjung lơ̆m tơring păng lơ̆m kơpal teh.

Ƀar ƀok kơdră bơnê kơ tơdrong jang hadoi đơ̆ng anih chih akŏm khôi luơ̆t 2 teh đak lơ̆m tơdrong tơbôl ƀar teh đak păng lơ teh đak; xơkơ̆t xơnong dơnơm jang hadoi ngĭ viê̆n lơ̆m tơdrong hơtŏk tơbôl kơ teh đak duh nhen tơbôl 2 păh đơ̆ng dôm teh đak. Lơ̆m khei năr truh, ƀar kơdră drơ̆ng nơ̆r gô pơtoi tơdrong axong khul kơpal, mă kăl noh kơ 2 anih chih akŏm khôi luơ̆t păng jang hơlen; pơtoi tơgŭm, jang hadoi păng tơgŭm dih băl tơ̆ dôm pơkăp jang hadoi lơ teh đak.