Kơsơ̆ măng năr 24/10, tơ̆ Hnam Kuôk hô̆i, Kơdră Kuôk hô̆i Vương Đình Huệ hlôi pơgơ̆r Lêh xơng Kơdră Thươ̆ng viê̆n Samdech Say Chhum păng Khul Kơpal Thươ̆ng viê̆n teh đak Campuchia. Đơ̆ng rŏng kơ Lêh xơng, 2 păh hlôi tơlĕch pơma đam.

Tơdrong pơma đam

Tơ̆ pơma đam, Kơdră Kuôk hô̆i Vương Đình Huệ păng Kơdră Thươ̆ng viê̆n Campuchia Samdech Say Chhum atŭm xơkơ̆t, 'măng năm tơmang âu jing kăp gĭt lơ̆m tơdrong hơmet păng hơtŏk tơbôl tơjê̆, jang hadoi tôm tơdrong Việt Nam - Campuchia pơma atŭm duh nhen đơ̆ng dôm anih chih akŏm khôi luơ̆t kơ 2 teh đak pơma adrô̆. Kơdră Kuôk hô̆i  Vương Đình Huệ 'meh vă, 2 teh đak kăl hơtŏk hrôih keh đang “Pơkăp tôm tơroh 2 teh đak jang mŭk drăm Việt Nam - Campuchia truh xơnăm 2030”; pơtoi pơm trong hiôk ăn anih jang mŭk drăm kơ rim teh đak tơlĕch pơm jang. Jang hadoi vei lăng tơnăp găh vei xơđơ̆ng tơpôl xơlam teh, hơlen kơjăp vă tang găn tơdrong pơm glăi mơ̆t lĕch găn xơlam teh, tơdrong “tĕch tơtông kon bơngai”. Găh Kuôk hô̆i Việt Nam păng Jang hadoi ngĭ viê̆n kơ 2 teh đak, 2 ƀok kơdră atŭm 'meh vă, 2 păh pơtoi pơma đam găh tơdrong jang hơlen chih akŏm, tơgŭm păng pơgơ̆r rim tơdrong jang kơ Ngĭ viê̆n; pơtoi pơm jang hadoi tơ̆ dôm tơdrong kăl akŏm hŏk hôp.