Tơ̆ jơ tơƀơ̆p, Kơdră Kuôk hô̆i Vương Đình Huệ gơih truh ƀok Manuel Marrero Cruz nơ̆r kơ kuh ‘lơ̆ng hơiă păng dôm tơdrong ‘mêm kăp gĭt hloh đơ̆ng Kuôk hô̆i păng kon pơlei Việt Nam; pơma hơdăh Đảng, Teh đak, Khŭl kơdră teh đak, Kuôk hô̆i păng kon pơlei Việt Nam ling lang hơdai tơgŭm tơdrong jang kach mang trŏ ƀlep đơ̆ng kon pơlei Cuba. Kơdră Kuôk hô̆i vang tơroi hăm Thủ tướng Cu-ba găh tơdrong tơplih ‘nao păng dôm tơdrong jang đơ̆ng Kuôk hô̆i tơ jê̆ âu, tơgop lơ̆m hơtŏk tơiung mŭk drăm tơpôl, mơ̆t jang hơdai hăm apŭng plĕnh teh đơ̆ng Việt Nam.

Roi tơbăt găh dôm tơdrong hơtŏk tơiung lơ̆m tơdrong pơvei đơ̆ng Kuôk hô̆i 2 teh đak. Tơ̆ hơnăp kơnh, Kơdră Kuôk hô̆i Vương Đình Huệ pơma hơdăh Kuôk hô̆i Việt Nam gô hơnơ̆ng jang hơdai kơjăp hăm Kuôk hô̆i Cuba vă pơm tơdrong hiôk ăn dôm anih mơdro sa 2 teh đak hơtŏk loi dơ̆ng tơdrong pơvei mŭk drăm, mơdro sa, tơmơ̆t jên jang hơtŏk tơiung tơgăl hăm tơdrong pơvei chĭnh trĭ ‘lơ̆ng hơiă đơ̆ng 2 teh đak, ƀlep kiơ̆ jơhngơ̆m đon pơgơ̆r păng ‘meh vă đơ̆ng đe Kơdră chĕp kơ̆l gĭt kăl 2 teh đak.