Kơdră Kuô̆k hô̆i akhan lơ̆m rim tơdrong pơvei atŭm đơ̆ng 2 tĕh đak, jang hơdoi găh pơtho pơhrăm đei anih dơ̆ng tôch gĭt kăl păng rai đunh rai tŏk ‘lơ̆ng. Hăm hlŏh 30.000 ‘nu sinh viên păng bơngai tơchĕng hơlen Việt Nam oei hŏk pơhrăm tơ̆ Australia, jang hơdoi găh hŏk pơhrăm ưh lăp tơgop pơm hơtŏk khul bơngai jang rơgei ăn Việt Nam păng mŭk drăm ăn Australia đĕch oei jing tơdrong hơmet kơjăp tơdrong oei xa, jŏh ayŏ ‘lơ̆ng hơiă, jing gơng tơƀưh ăn kon pơlei 2 tĕh đak.

Kơdră tơm vei lăng pơtho pơhrăm Australia roi tơbăt: Việt Nam dang ei dơ̆ng mă 4 găh kơsô̆ hŏk tro, sinh viên oei hŏk pơhrăm tơ̆ Australia păng hơnơ̆ng lui hăm dôm trong jang hơdoi tih găh pơtho pơhrăm đơ̆ng 2 tĕh đak. 2 păh akhan, tơdrong pơgơ̆r Hop akŏm jang hơdoi găh Pơtho pơhrăm Việt Nam - Australia ƀlep ƀât ‘măng năm hơpong tơ̆ Australia đơ̆ng Kơdră Kuô̆k hô̆i ‘nŏh jĭ 1 tơdrong jang tôch gĭt kăl, vang pơm hơtŏk tơdrong jang hơdoi găh pơtho pơhrăm đơ̆ng 2 tĕh đak.