Lơ̆m ‘măng năm hơpong tơ̆ tĕh đak Argentina, pơgê hei (26/4 kiơ̆ jơ Việt Nam),  Kơdră Kuô̆k hô̆i Vương Đình Huệ đei ƀai iung pơma găh trong jang gĭt kăl lơ̆m tơdrong tơbăt 50 sơnăm pơjing tơdrong pơvei Argentina – Việt Nam dang ei păng ning mônh kơnh.

Kiơ̆ Kơdră Quốc hội Vương Đình Huệ, mă đơ̆ng tôch hơtăih băl păng mă đơ̆ng oei tơ̆ 2 châu lŭk pha ra băl, 2 hơdrĕch hơdrung oei hơnơ̆ng roi băt ăn băl păng vang tưk tơiung dôm kơjă kăp gĭt atŭm ‘lơ̆ng hơ iă păng gơ̆h hơgei: ‘Nŏh jĭ đon hơpơi ‘mĕh rơngei hiôk hian, kon pơlei pơm tơm păng jang tŏk ăn tĕh đak, hơnŭk hơnoa, hiôk chơt păng gơ̆h hơgei ăn kon pơlei.

Kiơ̆ kơ ‘nŏh, 2 tĕh đak athei hơnơ̆ng hơtŏk tơdrong tơiung pơjing tơdrong pơvei đơ̆ng Kơdră chĕp kơ̆l 2 tĕh đak, kiơ̆ đơ̆ng dôm ‘măng năm hơpong tơ̆ băl păng tơƀâp pơma nuh tơ̆ dôm hop akŏm lơ̆m tơring păng apŭng plenh tĕh; tưk tơiung tơdrong pran ‘lơ̆ng đơ̆ng jang hơdoi tơ̆ Nghị viện 2 tĕh đak, dôm khul đảng; tưk tơiung tơdrong pơgơ̆r pơma nuh. 2 păh athei tơgĕch iŏk dôm tơdrong ‘lơ̆ng păng tơdrong pơkăp tĕch mơdro hiôk hian, mă loi jĭ Mê-cô-xua, CPTPP, atŭm hăm ‘nŏh năm truh FTA đơ̆ng Việt Nam păng Mê-cô-xua.