Apĭnh jet gia păng asong tơmam ăn đe linh jĭ rơka, linh jĭ jăn ăl 1/4 kơ 15 dêh char, pơlei tơm lơ̆m teh đak tŏk bŏk đei hơmet tơ̆ Hơnih vei rong, Kơdră Quốc hội Trần Thanh Mẫn pơma hơdăh tơdrong jang vei lăng ăn bơngai đei kŏng, linh jĭ rơka, unh hnam linh lôch tang ăn teh đak ling lang đei Đảng păng Teh đak băt hơdăh ‘noh jĭ hơnăp jang chĭnh trĭ tơm, tơƀôh jơhngơ̆m đon băt “Nhă đak ƀlŏk kơ tu” đơ̆ng hơdrĕch hơdrŭng.

Kơdră Quốc hội Trần Thanh Mẫn athei tơ̆ hơnăp kơnh, kơdră đảng, kơdră chĕp kơ̆l pơlei tơm Hồ Chí Minh hơnơ̆ng bơngơ̆t truh man ‘nao, pơm hơmet ming hnam ‘mêm mơnat, pơjao hla ar ‘mơ ‘met jên, pơjing tơdrong jang, pơgơ̆r khăm jĭ, asong đĕch pơgang păng pơtruh dôm tơmam pơgang nhen gre grŏl, kơmăy tơgŭm mơ̆ng kơtơ̆ng ăn bơngai đei kŏng, vă hơtŏk ‘lơ̆ng tơdrong hơrih dôm unh hnam teh đak tơgŭm, bơngai đei kŏng.