Pơma tơ̆ tơƀâp, Tổng Bí thư, Kơdră teh đak Tô Lâm pơma hơdăh, đơ̆ng rŏng kơ pơjing, hơnăp jang đơ̆ng anih chĕp kơ̆l pơgơ̆r ‘nŏh roi tơƀôh, chĕp kơ̆l pơgơ̆r tơlĕch dôm tơdrong jang kiơ̆ trong jang đơ̆ng Đảng, Teh đak vă vei kơjăp tơdrong sơđơ̆ng chinh trĭ, jang tŏk, vei lăng ‘lơ̆ng tơdrong sơđơ̆ng teh đak, sơđơ̆ng tơ̆ Tây Nguyên.

Bơnê păng pôk pơ ư đe kăn ƀô̆ so, bơngai jang adrol ki, dôm kơdră Anih chĕp kơ̆l pơgơ̆r Tây Nguyên adrol sơ̆, ưh hli gleh hrat, pơmat tat, bơ̆ jang oei xa kơjăp tơ̆ tơring, jang đang ‘lơ̆ng tơdrong jang mă Đảng, Teh đak pơjao; Tổng Bí thư, Kơdră teh đak Tô Lâm hơpơi ‘mĕh dôm bơngai âu hơnơ̆ng vei kơjăp jơhngâm đon đơ̆ng bơngai pơm kăn ƀô̆ tơ̆ Anih chĕp kơ̆l pơgơ̆r Tây Nguyên hơnơ̆ng oei xa jê̆ kon pơlei, hlôh vao kon pơlei, pơyom kon pơlei, jang tơnăp hăm kon pơlei. Hăm bưng ai păng tơdrong gơ̆h hơgei đơ̆ng kơdih, hơnơ̆ng tơgop nơ̆r ăn khul chĕp kơ̆l đảng, khul kơdră tơring, hơnơ̆ng jĭ gơng tơƀưh đơ̆ng Đảng, Teh đak hăm kon pơlei dôm hơdrĕch hơdrung Tây Nguyên.