Tơ̆ Hơnih ming man tơring pơlei oei ‘nao să 5ha tơ̆ tơring Hồng Sơn, dêh char Lâm Đồng kơ mơjĭt kŏng nhân atŭm hăm lơ gre tŏk bŏk ming man trong nơnăm. Ƀok Đặng Hữu Linh, Kơdră chĕp pơgơ̆r hơnih ming man tơbăt, hơnih ming man tĕnh koăng, truh dang ei hlôi jang keh đang vă jê̆ 50% tơdrong jang.“Tơ̆ hơnih ming man mă dang yơ oei vei kơjăp 25 ‘nu bơngai jang, truh hloi vơ̆r kmăi. Dang ei ‘nhŏng oh tŏk bŏk kơrŭn đĭ ai vă sơđơ̆ng ming man keh đang lơ̆m khei 9/2026”.

Tơ̆ Hơnih ming man tơring pơlei oei ‘nao tơ̆ tơring Lương Sơn, dêh char Lâm Đồng, rim kŏng nhân atŭm hăm lơ kmăi kmŏk gre jei tok bŏk mơdŭk mơdăk pơm trong. Tơ̆ Hơnih ming man tơring pơlei oei ‘nao tơring Lương Sơn đei ming man lơ̆m hơgăt teh să 4ha, đơ̆ng rŏng keh đang gô sơđơ̆ng ăn 100 ŭnh hnam oei. Tơ̆ ou oei đei hơnih mơdro sa tơm. Ƀok Phạm Huy Hoàng, Kơdră chĕp pơgơr ming man tơbăt, hăm iung jang nhen dang ei, hơnih tơchĕng lăng gô keh đang lơ̆m tŏk bŏk khei 8 kơnh.“Rim năr hơnih ming man đei 8 khul jang ming man, mĭnh khul đei đơ̆ng 10-12 ‘nu kŏng nhân. Bơ̆jang vei lăng sơđơ̆ng jang ming man, sơđơ̆ng cham char pơm kiơ̆ ƀlep hla boar đơ̆ng dêh char pơtruh ăn. Pơtih gia nhen, tơlei ŭnh hơyuh đei dăng sơđơ̆ng, ưh kơ lê̆ chă ming mơ ‘nhuêng mơ ‘nhoang. Hơnih ayơ hlŭn, tơdrut ‘noh dăng tơlei tơbăt ăn, kơƀang tơbăt ăn sơđơ̆ng tơ̆ hơnih ming man vă sơđơ̆ng chă yak ou to ăn kon pơlei păng ‘nhong oh ming man”.

Vă pơvih pơvăn ăn tơdrong vă jang ming man trong gre treng rĕnh ‘lơ̆ng hơ iă, dêh char Lâm Đồng hlôi iŏk tơvih teh să hloh 1.000ha. Dêh char tơlĕch iung jang kơtang ming man 8 tơring pơlei oei ‘nao ăn vă jê̆ 1.000 ŭnh hnam kon pơlei đei ƀơm đơ̆ng tơdrong vă jang pơm trong gre treng. Ƀok Đặng Tuấn Anh, Hơnih chĕp pơgơ̆r vei lăng tơdrong vă jang ming man kơsô̆ 2 dêh char Lâm Đồng tơbăt, dang ei đĭ đăng teh hlôi pơjao vă rim hơnih iung jang ming man 8 tơdrong vă jang. Adoi dôm tơdrong tơhlăk tơhlĭn lơ̆m jơ ‘năr ming man hlôi đei hơmet pơ ‘lơ̆ng vă iung jang ming man tenh koăng keh đang:“Rim hơnih sir iŏk teh tơmo lơ̆m dêh char Bình Thuận so, mă kăl bro păh Pơbăh đei lơ hơnih sir iŏk teh tơmo hlôi đĭ jơ ‘năr ăn asong jang kơna ưh kơ đei pơtruh ăn. Tơ-‘ngla tơmơ̆t jên jang hlôi iung jang hơdoi hăm Hơnih vei lăng Choh jang sa pang Cham char dêh char păng rim hơnih bơ̆ jang đei ƀơm truh vă tơchă trong hơmet pơ ‘lơ̆ng. Hrei ou tơdrong tơhlăk tơhlĭn kơpal hlôi xek tơlang keh đang, rim bơngai tơmơ̆t jên jang tŏk bŏk atŏk kơtang iung jang vă pơklăp ăn khei năr hơlou hiơ hiơ̆ iung jang”.