Pơma tơ̆ jơ tơƀâp, Phŏ Kơdră Quốc hội Nguyễn Thị Thanh pơma hơdăh, Đảng păng teh đak hơnơ̆ng chih hơdăh, vei lăng năng tông truh bơngai đei kŏng hăm kăch mang jĭ hơnăp jang chinh trĭ hai, jĭ nơ̆r athei jang đơ̆ng plei nuih hai, jĭ tơdrong juăt ‘lơ̆ng "Nhă đak ƀlŏk kơtu", "Tơgŭm ăn bơngai đei kŏng" đơ̆ng hơdrĕch hơdrung bơ̆n.

Phŏ Kơdră Quốc hội Nguyễn Thị Thanh hơpơi ‘mĕh dôm unh hnam, rim bơngai đei kŏng hơnơ̆ng chĕp vei kơjăp tơdrong juăt jang kăch mang, pơtho tơƀôh ăn jơhnơr mơlôh ‘moi kiơ̆ chă adrol, adrin bơ̆ jang pơjei băl 'mêm teh đak, vang tơgop pơjing dêh char Đắk Lắk jang tŏk hrĕnh păng pran kơjăp.