Pơma pơih blŭng ‘măng hop akŏm, Kơdră Quốc hội Trần Thanh Mẫn pơma hơdăh tơdrong pơm tŏ sĕt bơngai jang ‘măng âu athei tơpă jing 1 tơdrong jang kach mang, tơdrong proh hơmet athei vei sơđơ̆ng khŭl jang mă tŏ sĕt bơngai, pran, jang hơgei, đei yua, ưh kơ proh hơmet kiơ̆ kơdih păng ƀlep trong jang tơm Trung ương pơm jŭk yŭk trong hơlâu păng tơring jang kiơ̆.

Đơ̆ng rŏng tơmơ̆t hơdai, pơm tŏ sĕt bơngai jang, tơchĕng hơdrol kơsô̆ tơm dôm anih jang kơ Quốc hội, anih jang găh Anih chĕp kơ̆l pơgơ̆r Quốc hội, dôm anih jang kơ Hơnih pơvih ăn Quốc hội gô tơjur hloh 30%. Kơdră Quốc hội Trần Thanh Mẫn athei dôm bơngai tang măt vang truh ‘măng hop akŏm âu akŏm ăn tơgop nơ̆r hơdăh lơ̆m rim tơdrong đơ̆ng hla ar chih pơtruh, roi tơbăt, chih pơkeh hla ar roi tơbăt pơtruh ăn Đảng khŭl Quốc hội ăn tơgop nơ̆r, vă tơtom roi tơbăt ăn Anih tơm Chĭnh trĭ ƀlep khei ‘năr hơgăt ‘noh jĭ hơdrol kơ ‘năr 31/12/2024.