Hôn bơnê tơdrong pơgơ̆r lơ ‘măng pơma nuh đơ̆ng Khul jang kơ Quốc hội 2 teh đak, Kơdră Quốc hội athei Grŭp Ngĭ si jang tơbôl Việt Nam – Hàn Quốc pơjing trong jang mă hơdăh vă tơlĕch jang, ‘lơ̆ng, đei yoa. Pơma nuh găh tơdrong iŏk yoa kơmăy rơgei lơ̆m tơdrong chih pơjing khôi luơ̆t, Kơdră Quốc hội Trần Thanh Mẫn ăn tơbăt, Việt Nam đei Luơ̆t Kơmăy rơgei păng Quốc hội oei hơtŏk tơdrong tơplih hăm kơmăy sô̆, atŭm hăm ‘nŏh đei tơdrong jang iŏk yoa AI hơdrô̆ lơ̆m tơdrong jang kơ Quốc hội, đei tơlĕch dang hlŏh 1 sơnăm âu ki păng hơnhăk ba tơdrong đei yoa roi ‘lơ̆ng tơpă.

Pơma hơdăh, Hàn Quốc dang ei jĭ teh đak tơmât jên jang lơ hlŏh kơ Việt Nam, Kơdră Grŭp Ngĭ si jang tơbôl Việt Nam - Hàn Quốc Moon Jin Seok hơmĕng đon pơhnŏng pơm hơtŏk jên tĕch mơdro 2 pang truh 150 ti USD lơ̆m sơnăm 2030 gô đei tơlĕch jang hiôk ‘lơ̆ng; tơroi tơbăt Hàn Quốc kŭm hơpơi ‘mĕh dôm anih tĕch mơdro Hàn Quốc vang bơ̆ jang lơ̆m dôm tơdrong jang pơm trong, man anih jang tih tơ̆ Việt Nam, kiơ̆ đơ̆ng noh pơjing dơ̆ng tơdrong ‘lơ̆ng lơ̆m tơdrong jang hơdoi ‘nao, roi đei yoa păng gĭt kăl lơ̆m chăl jang tŏk ‘nao đơ̆ng tơdrong pơvei kơ 2 teh đak.