'Nâu jĭ 'măng hop akŏm mă hơtuch hơmet ăn Hop akŏm mă 2, Quốc hội jăl XVI, tơchĕng hơdrol vă pơdrơ̆ng nơ̆r ăn 38 kơ luơ̆t păng lơ tơdrong tơchơ̆t gĭt kăl, lơ̆m nŏh đei 7 tơdrong tơchơ̆t chih hơgăt khôi luơ̆t. Kơdră Quốc hội Trần Thanh Mẫn athei dôm anih chih, hơlen năng, hơnơ̆ng tơplih 'nao đon tơchĕng, trong jang, hơmet pơ 'lơ̆ng dôm tơdrong vă tơroi ăn Quốc hội; akŏm jơhngâm pơm hơdăh dôm tơdrong tơm, năng kăl tơdrong 'lơ̆ng, gơ̆h jang kiơ̆ păng tơdrong ‘mĕh vă jang tŏk 'nŏh jĭ tơdrong tơm hlŏh. Lơ̆m noh, đei luơ̆t teh (oei chih hơmet ming) păng luơ̆t chih tơlĕch hla ar hơgăt luơ̆t đei năng tôch gĭt kăl.

Kơdră Quốc hội pơma hơdăh, luơ̆t teh đei ƀơm truh đĭ đăng tơdrong jang mŭk drăm păng tơdrong arih kơ kon pơlei, đei lơ kon pơlei, anih tĕch mơdro tơrek truh, yoa thoi noh athei jang mă hơlen, chih mă 'lơ̆ng. Anih chĕp kơ̆l pơgơ̆r Quốc hội kŭm vang tơgop nơ̆r ăn tơdrong chih hơmet ming Luơ̆t teh, lơ̆m noh năng kăl truh trong gơ̆h jang kiơ̆, tơdrong iŏk yoa teh păng chih tơbăt yă teh kiơ̆ trong rơđăh rơđong, tơpăt 'lơ̆ng, trŏ ƀlep, pơm ‘lơ̆ng ăn tơdrong đei yoa đơ̆ng Teh đak, bơngai yoa teh păng bơngai tơmơ̆t jên jang.