Kơsơ̆ 29/7 (kiơ̆ jơ tơ̆ tơring), tơ̆ Anih jang kơ Liên hợp quốc (LHQ) tơ̆ Thuỵ Sỹ, ƀlep ƀât vang truh Hop akŏm Kơdră Quốc hội apŭng plenh teh ‘măng mă 6, Kơdră Quốc hội Trần Thanh Mẫn đei jơ tơƀâp hăm Kơdră chĕp kơ̆l Anih jang kơ Liên hợp quốc tơ̆ Geneva Tatiana Valovaya. Tơ̆ jơ tơƀâp, Kơdră Quốc hội Trần Thanh Mẫn pơma hơdăh Việt Nam hơnơ̆ng tơgŭm ăn trong jang lơ pang păng vă hơnơ̆ng vang bơ̆ jang, tơgop roi đunh roi ‘lơ̆ng ƀiơ̆ lơ̆m dôm tơdrong jang kơ Liên hợp quốc.

Việt Nam oei chih măt lĕch pơjei bơ̆ jang dơ̆ng lơ̆m Anih vei lăng tơdrong pơm tơm kơ kon bơngai đơ̆ng 2026-2028, tơdăh đei pôk rơih Việt Nam gô đei lơ tơdrong jang păng tơdrong pơchĕh rơgei vă hơtŏk hơnăp jang đơ̆ng anih âu ƀât mă lơ̆m apŭng plenh teh oei đei lơ tơdrong krê, pơlong nol hrei ‘nâu. Yă Kơdră Tatiana Valovaya bơnê kơ Việt Nam vang tơgŭm ăn dôm tơdrong jang atŭm kơ Liên hợp quốc, lơ̆m noh đei jang kiơ̆ tơdrong pơchĕh pôk pơ ư 17 ‘nu drŏ kăn rơgei mưh bơ̆ jang dôm tơdrong jang tŏk tơm kơjăp ‘lơ̆ng. Yă tơchĕng ‘lơ̆ng  hơnăp jang, tơdrong jang đơ̆ng khul tang măt ăn Việt Nam tơ̆ dôm anih jang kơ Liên hợp quốc kŭm nhen lơ̆m dôm tơdrong jang atŭm. 2 păh drơ̆ng nơ̆r hơnơ̆ng pơm hơtŏk tơdrong pơvei jang hơdoi Việt Nam - Liên hợp quốc tơ̆ hơnăp kơnh.