Tơ̆ năr akŏm, Kơdră Quốc hội Trần Thanh Mẫn athei, pơlei tơm Hà Nội akŏm pơgơ̆r tơlĕch jang Tơdrong tơchơ̆t Hop akŏm Pơlei tơm âu ki; dar deh hơmet ‘lơ̆ng pơtôch 4 tơdrong ‘noh jĭ tơhlăk trong nơnăm; sơđơ̆ng anih kơdrơ̆m, ‘yâu, rơgoh, hơgei; ‘mê̆ ‘mach cham char, ‘mê̆ ‘mach tu đak, hơyuh păng đak lơ̆p tơ̆ anih kơdrơ̆m păng tơring tơ ter pơlei tơm.

Kơdră Quốc hội tơtă kơ pơlei tơm Hà Nội pơgơ̆r đei yua hloh dơ̆ng tơdrong krao hơvơn “Đĭ đăng kon pơlei tơgoăt pôm nơ̆r ƀơ̆r đon pơjing tơring tơrang ‘nao, anih kơdrơ̆m hơgei”, hơtŏk hơnăp jang vei lăng kơdih đơ̆ng Kon pơlei, pơjing tơring “hơdăh, ‘yâu, rơgoh, ‘lơ̆ng, sơđơ̆ng”, tơklep kơjăp hăm tơdrong jang “Đĭ đăng kon pơlei vei sơđơ̆ng Teh đak”... hơdrin ưh kơ lê̆ đei tơdrong kơnê̆ lơ̆m tơpôl, ưh kơ yua, tĕch mơdro hơ̆t điện tử, ma túy, bơngai pơm glăi khôi luơ̆t.