Pơma tơ̆ jơ bơ̆ jang, Kơdră teh đak Lương Cường pơma hơdăh, athei hơnơ̆ng hơtŏk tơdrong tơiung pơjing anih jang đảng lơ̆m Anih Dăr hơlen mă rơgŏh ‘lơ̆ng, pran kơjăp; hơtŏk tơdrong chĕp kơ̆l đơ̆ng Đảng hăm tơdrong jang dăr hơlen, pơm ‘lơ̆ng ăn tơdrong kon pơlei pơm tơm, tưk tơiung hơnăp chĕp kơ̆l đơ̆ng anih jang đảng, khul jang đảng, khul kơdră tơring păng khul grŭp tơpôl lơ̆m rim anih jang kơ Anih dăr hơlen.

Ƀơm truh tơdrong kăt tơjur khul bơngai jang, Kơdră teh đak tơtă ‘nâu jĭ 1 tơdrong tôch gĭt kăl, Anih dăr hơlen athei bơ̆ jang mă ‘lơ̆ng trong jang đơ̆ng Đảng kiơ̆ trong hơmet ming khul jang tŏ sĕt bơngai – gơ̆h hơgei – pran kơjăp păng đei yoa; tơklep hăm tơplih ‘nao khul bơ̆ jang, trong chĕp kơ̆l pơgơ̆r; pơm ‘lơ̆ng ăn tơdrong hơmet ming kăn ƀô̆, bơngai jang kơ teh đak đei jơhngâm đon tơpăt ‘lơ̆ng, đei ƀiên chê̆ lăp tôm, chih hơdăh kơchư̆k jang, tơdrong jang mă lăp hăm yăn âu; chih hơdăh tơdrong klăih song hơnăp jang ăn anih vei lăng kăn ƀô̆, bơngai jang kơ teh đak.