Tang măt ăn kơdră Đảng, Teh đak păng kon pơlei Việt Nam, Ƀok Kơdră teh đak bơ̆n thơ thou hơ-iă păng pơtruh nơ̆r hmach bơnê hăm tơdrong jang đei jơnei kăp gĭt mă Đảng, Teh đak păng kon pơlei Lào 'nhŏng oh hlôi jang đei lơ̆m tơdrong jang hơtŏk tơ-iung lơ̆m 50 sơnăm kơ ou.

Tơƀôh hơdah tơdrong tơbôl kăp gĭt Việt Nam - Lào, Lào - Việt Nam hlôi đei đe kơdră nuih mơng noh Ƀok Kơdră Hồ Chí Minh, Ƀok Kơdră Kaysone Phomvihane păng Ƀok Kơdră Souphanouvong kơtă pơm trong; đei dôm hnưr kơdră kơpal păng kon pơlei 2 teh đak vei răk tơ-iung hăm đak pơ-uh, jơhngơ̆m pran, kơ̆l 'ngok hơgei păng hăm sĕch pham hloi, Kơdră teh đak sơkơ̆t hơdah, noh jĭ mŭk drăm kăp gĭt hloh, jing “tơdrong tơbôl hŭi kơ đei lơ̆m jơhnơr hơrih apŭng plenh teh”, jing hơnih gơnơm kơjăp vă dôm jơhnơr bơngai hrei ou păng hơnô̆ hơnăp kơnh pơtoi chih akŏm dôm tơdrong 'lơ̆ng gah tơbôl kăp gĭt, gah tơdrong tơguăt tơguăl kăp gĭt păng jang hơdoi tôm tơdrong kơ 2 teh đak.