Pơjao tơchơ̆t păng pơma ah lêh pơjao, tang măt ăn kơdră Đảng, Teh đak, Kơdră teh đak bơ̆n Lương Cường thơ thâu kơ ƀok Lê Quang Minh, thơ thâu kơ Khul linh kon pơlei Việt Nam păng Anih tơm jang Chĭnh trĭ Khul linh kon pơlei Việt Nam. Ră hơdah, âu jing tơdrong sô̆, tơdrong pơ-ư̆ pơ-ang kơ đe kang ƀô̆, khul linh; atŭm hăm noh jĭ tơdrong sô̆ hăm kơdih po ƀok, unh hnam păng pơlei pơla ƀok Lê Quang Minh.

Pơma ah jơ lêh, Thượng tướng Lê Quang Minh sơkơ̆t hơdah gô jang tơnăp tơdrong pơgơ̆r jang đơ̆ng Kơdră teh đak; tơguăt kơjăp hăm Đảng, Teh đak păng kon pơlei; hăt hot hŏk pơhrăm păng pơm kiơ̆ nơ̆r pơtho đơ̆ng ƀok kơdră Hồ Chí Minh gah đon bơnôh trong pơm jang kơ minh yŏng linh 'noh: Hơbĕch – Nuih mơng – Đon 'lơ̆ng – Lui yom - Tơpăt jue. Atŭm hăm noh pơtoi hơdrin pơhrăm dơh po, vei tơnăp đon bơnôh kăch mạng, kơchăng iŏk jang păng keh đang rim sơnong jang đei Đảng, Teh đak, Khul linh păng kon pơlei pơjao jang.