Tơchơ̆t ră hơdah, dôm bơngai âu hlôi jang hơgei lơ̆m pơm kiơ̆ sơnong pơtơ̆p pơhrăm gah trong tơblah tơjră kơnê̆, tơgop lơ̆m tơdrong tơ-iung pơjing chuh nghia xah hô̆i păng vei lăng teh đak. Hơdrol kơ noh ah năr 5/12, Phŏ Thủ tướng teh đak bơ̆n Nguyễn Hòa Bình tang măt ăn Jơnŭm pơgơ̆r teh đak kĭ Tơchơ̆t gah tơdrong pôk Ƀăng "Teh đak pôk bơnê" ăn 12 'nu linh lôch tang lơ̆m kơplah pơtơ̆p pơhrăm gah trong vei lăng teh đak oei lơ̆m Khul linh Kuân khu 7.

Đơ̆ng rŏng kơ đei tơdrong, Anih tơm linh Kuân khu 7 hlôi tơtom pơgơ̆r rim anih jang kơpal jang hadoi kơjăp hăm rim jăl pơgơ̆r tơring dah chă hơlen lăng anih đei sar bar, chă akŏm hơlen tơdrong đei; atŭm hăm noh jang tơnăp tơdrong tơlĕch tơgŭm; chă hơlen, vang glơng tơdrong ol sơ-'ngon hăm unh hnam đei linh lôch tang.