Tơ̆ jơ sơng, Kơdră teh đak bơ̆n Lương Cường sơkơ̆t hơdah, tơdrong tơbôl, tơguăt tơguăl kăp gĭt, jang hơdoi tôm tơdrong Việt Nam - Lào đei tơdrong kăp gĭt hăm tơdrong tơ-iung pơjing păng vei lăng teh đak kơ rim teh đak; jing tơdrong hơrih păng hơtŏk tơ-iung kơ rim teh đak.

Kơdră teh đak bơ̆n Lương Cường pơtruh nơ̆r, lơ̆m khei năr truh khul linh 2 teh đak hơtŏk jang tơbôl, pơma đam dih băl vă pơjing khul linh pran kơtang gah chinh trĭ, đon tơchĕng, kang ƀô̆ păng anih jang; tơrĕk hơtŏk, vei kơjăp đon pơkăp jang đơ̆ng Đảng, vei sơđơ̆ng tơdrong pơgơ̆r jang kơtă gah rim tơdrong jang đơ̆ng Đảng hăm Khul linh kon pơlei; hơtŏk tơnăp sơnong tơlĕch đơ̆ng Đảng, tơdrong jang chinh trĭ lơ̆m rim tơdrong jang, tơlĕch jang hơdoi kơ 2 khul linh; hơtŏk tơroi tơbăt, pơtho tơnăp gah jơhnơr hơrih, tơdrong kăp gĭt lơ̆m jang tơbôl Việt Nam - Lào.